Manut uger-uger saking Guru Wisesa Pemerintah Provinsi Bali minakadi Peraturan Gubernur Bali Nomor 80 Tahun 2018 tentang Pemuliaan Bahasa, Sastra dan Aksara Bali, Pemerintah Desa Padangsambian Kaja ring warsa 2022 puniki ngelaksanayang parikrama Bulan Bahasa Bali nemonin rahina Saniscara Wage Wuku Prangbakat, tanggal 12 Ferbuari 2022 antuk ngelarang makudang pacentokan utawi wimbakara, inggih punika Ngwacen Aksara Bali sane kamiletin olih para Daa Teruna, Nyurat Aksara Bali sane kamiletin olih Alit-alit Sekolah Dasar, Mesatua Bali sane kamiletin olih para Krama Istri, lan Pesantian sane kamiletin olih Daa Teruna. Sangkaning gering agung Covid-19 sane durung rered, makasami acara ngawit pangungkab, wimbakara nyantos penyineb kalaksanakan arahina turmaning nganutin protokol kesehatan antuk ngewatesin katah pamilet lan pendamping sane wenten ring genah acara.
Pamucuk prawartaka Bulan Bahasa Bali Desa Padangsambian Kaja warsa 2022, Ni Putu Widyari, S.Pd, ring galah pangungkab nyantenang indik Bulan Bahasa Bali warsa 2022 wantah kalaksanayang antuk tema "Danu Kerthi : Gitaning Toyo Ening", Air Sumber Pengetahuan, sane tetuweknyane, Bulan Bahasa Bali pinaka sulur sastra sane nenten surud-surud ngembahin awiawahara, kasukertan, lan kautamaan ring jagate. Pamilet wimbakara makasami wantah saking wewidangan Desa Padangsambian Kaja inggihan punika saking Sekolah Dasar, Sekaa Teruna, lan Krama Istri Banjar sawewidangan Desa Padangsambian Kaja. Juri Pembina wantah saking Universitas Dwijendra wit sangkaning kawentenan Kerjasama Desa oleh Pemerintah Desa Padangsambian Kaja lan Universitas Dwijendra sane taler wenten ring widangan pelestarian budaya Bali. Kejantenang taler indik prabiya sane kaanggen ngelaksanayang Bulan Bahasa Bali puniki wantah makasami saking anggaran Pemerintah Desa Padangsambian Kaja sane mungguh ring APB Desa Tahun Anggaran 2022.
Perbekel Padangsambian Kaja, I Made Gede Wijaya, S.Pt., M.Si., ritatkala ngicen pawarah-warah tur sapisanan ngungkab pemargi Bulan Bahasa Bali Desa Padangsambian Kaja Warsa 2022, nyantenang kawigunan Bulan Bahasa Bali pinaka sulur ngajegang kautaman sastra lan budaya Bali sane mangkin nyayan rered utamanyane ring para alit-alit lan yowana sane akeh nenten malih nganggen bahasa Bali pinaka bahasa seharina ring paumahan bilih-bilih ring sekolah utawi genah sane ketah. Parikrama Bulan Bahasa Bali puniki taler wantah cihna uratian Pemerintah Desa Padangsambian Kaja ngajegang sastra lan budaya Bali.
Para pembina taler ngicen piteket-piteket sane patut mapaiketan ring soang-soang wimbakara majeng ring pamilet pinaka cihna pembinaan sane berkelanjutan sadurung kauningayang sapa sira sane ngamolihang jayanthi ring soang-soang wimbakara punika. Para jayanthi ngamolihang piala, pramana patra lan jinah pembinaan. Para pamilet sane nenten jayanthi taler kapica jinah pembinaan.
